MSHAURI Mkuu wa Kiufundi kutoka International Labour Organization, Aida Awel, amesema usimamizi mzuri wa masuala ya uhamiaji pamoja na ushirikiano wa karibu kati ya nchi za kikanda ni muhimu katika kuhakikisha wafanyakazi wahamiaji wanapata mazingira salama ya kufanya kazi huku haki zao zikilindwa ipasavyo.
Aida amesema hayo leo Juni 10 jijini Dar es Salaam wakati akizungumza na waandishi wa habari katika kikao maalum kilichoandaliwa na ILO kwa lengo la kujadili masuala ya wahamiaji wafanyakazi nchini Tanzania na waliopo katika Ukanda wa East African Community.
Amesema uhamiaji ni sehemu ya maisha ya jamii za kisasa na unaweza kuwa fursa kubwa ya maendeleo ya kiuchumi na kijamii iwapo utasimamiwa kwa ufanisi na kwa kuzingatia misingi ya utawala bora.
“Uhamiaji unaweza kuchangia ukuaji wa uchumi na huduma za kijamii iwapo fursa hiyo itatumika kwa kufuata sheria na taratibu zilizowekwa. Tanzania pia ina nafasi ya kimkakati katika masuala ya uhamiaji wa kikanda,” amesema Aida.
Aidha, amesema uhamiaji salama na wenye mpangilio unaweza kuleta manufaa makubwa kwa nchi asili za wahamiaji, hasa wanapopata kazi zenye staha katika mataifa wanayokwenda na kuwa na uwezo wa kutuma fedha kwa familia zao bila kukumbana na ukiukwaji wa haki za binadamu.
Aida amesema ili wahamiaji wanufaishe nchi zao za asili, kuna umuhimu wa kuimarisha mifumo ya kulinda haki za binadamu, kuandaa sera na takwimu sahihi, kuongeza uelewa kwa umma kuhusu masuala ya uhamiaji pamoja na kuzijengea uwezo taasisi zinazosimamia sekta hiyo.
Kwa upande wake, Mkurugenzi wa Jinsia, Wanawake na Vijana wa Trade Union Congress of Tanzania na Mratibu wa Kituo cha Rasilimali kwa Wafanyakazi Wahamiaji, Nasra Shargy, amesema uhamiaji wa kazi unaendelea kuwa na umuhimu mkubwa katika ukanda wa Afrika Mashariki.
Nasra amesema uhamiaji unaweza kuleta fursa kwa wafanyakazi na kuchangia ukuaji wa uchumi iwapo utasimamiwa vizuri, lakini akaonya kuwa njia zisizo salama za uhamiaji huwafanya wafanyakazi kuwa katika hatari ya unyonyaji, matumizi mabaya, biashara ya binadamu na ukiukwaji wa haki za kazi.
Naye Mkuu wa Utafiti na Uhamasishaji Sera katika Association of Tanzania Employers, Renatus Mbamilo, amesema uhamiaji wa kazi bado ni suala nyeti linalohitaji utoaji wa taarifa unaozingatia ushahidi pamoja na kuongeza uelewa wa umma.
Mbamilo ameipongeza ILO kwa kuandaa jukwaa lililowakutanisha viongozi wa serikali, waajiri, wawakilishi wa wafanyakazi na waandishi wa habari kujadili changamoto na fursa zinazotokana na uhamiaji wa kazi.
